बैतडी । सेती नदीमा बगेर बैतडीका एक बालक बेपत्ता भएका छन् ।
सिगास गाउँपालिका–५ घर भएका दुई बर्षीय दिलिप धामी सेती नदीमा बगेर बेपत्ता भएका जिल्ला प्रहरी कार्यालय बैतडीका प्रवक्ता,प्रहरी निरीक्षक भुवनप्रसाद तिमिल्सैनाले जानकारी दिए ।
सोमबार साँझ साढे ६ बजेतिर दिलिपकी आमा पार्वती धामी लुगा धुन सेती नदी किनारमा गएकी र सोही बेला सँगै गएका दिलिप बगेर बेपत्ता भएका बताइएको छ ।
सिगास गाउँपालिका–६ माइतीघर आएकी पार्वती साँझको समयमा लुगा धुन सेती नदी किनारमा गएकी प्रहरी निरीक्षक तिमिल्सैनाले बताए । लुगा धुने क्रममा संगै रहेका बालक बगेर बेपत्ता भएका हुन् ।
घटनापछि स्थानीयबासी र प्रहरीको टोलीले बालकको खोजी कार्य जारी राखेको जिल्ला प्रहरी कार्यालय बैतडीले जनाएको छ ।