दार्चुला । अपिहिमाल गाउँपालिकाको समग्र विकास, स्थानीय कला–संस्कृति, पर्यटकीय सम्भावना तथा गाउँपालिकाका विभिन्न गतिविधिलाई समेटेर तयार पारिएको आधिकारिक मासिक ई–बुलेटिन ‘अपि स्मारिका’ को पहिलो अंक प्रकाशित भएको छ।
गाउँपालिकाले भदौ महिनाका गतिविधिलाई समेटेर तयार पारेको पहिलो अंक सफलतापूर्वक प्रकाशन भएको अपि स्मारिका ई–बुलेटिनका शिक्षा युवा तथा खेलकुद शाखा प्रमुख एवं गाउँपालिकाका सूचना अधिकारी मदन राज जोशीले जानकारी दिए ।
उनका अनुसार ई–बुलेटिन निर्माण तथा प्रकाशनमा गाउँपालिकाका जनप्रतिनिधि, प्रमुख प्रशासकीय अधिकृत, कर्मचारी तथा सम्पादक समितिको योगदान रहेको बताए । गाउँपालिकाले ‘अपि स्मारिका’ ई–बुलेटिन तयार पार्न शिक्षा शाखा संयोजक जोशीको संयोजकत्वमा ५ सदस्यीय समिति गठन गरेको थियो।
स्मारिकाको परिकल्पनादेखि प्रकाशनसम्म नीतिगत मार्गदर्शन, हौसला तथा अभिभावकत्व प्रदान गर्ने गाउँपालिकाका प्रमुख प्रशासकीय अधिकृत तथा सम्पूर्ण जनप्रतिनिधिलाई गाउँपालिकाले धन्यवाद ज्ञापन गरेको छ।
त्यस्तै, भौगोलिक विकटता र सीमित स्रोत–साधनका बाबजुद तथ्य–तथ्याङ्क सङ्कलन, लेखन, सम्पादन तथा प्राविधिक व्यवस्थापनमा खटिएका सम्पादक समितिका सदस्य तथा कर्मचारीप्रति पनि गाउँपालिकाले आभार व्यक्त गरेको छ।
गाउँपालिकाका गतिविधि, विकास निर्माण, स्थानीय कला–संस्कृति तथा पर्यटकीय सम्भावनालाई नियमित रूपमा नागरिकसमक्ष पुर्याउने उद्देश्यले ‘अपि स्मारिका’ प्रकाशन सुरु गरिएको हो।
गाउँपालिकाले ई–बुलेटिनले पारदर्शिता, सुशासन र प्रविधिमैत्री कार्यशैलीलाई आम नागरिकमाझ पुर्याउन महत्वपूर्ण कडीका रूपमा काम गर्ने विश्वास व्यक्त गरेको छ।
अपि स्मारिका’ ई–बुलेटिन तयार गरी प्रकाशित गर्ने अपिहिमाल गाउँपालिका सुदूरपश्चिम प्रदेशकै पहिलो पालिका समेत बनेका छ ।
