काठमाडौँ । भारतको उत्तर प्रदेशमा आएको शक्तिशाली आँधी, वर्षा र असिनापानीका कारण ठूलो जनधनको क्षति भएको छ ।
राज्य विपद् व्यवस्थापन तथा राहत कार्यालयका अनुसार खराब मौसमका कारण ८९ जनाको मृत्यु भएको छ भने ५३ जना घाइते भएका छन् । साथै ११४ वटा चौपायाको मृत्यु भएको र ८७ वटा घरमा क्षति पुगेको जनाएको छ ।
स्थानीय सञ्चारमाध्यमले सार्वजनिक गरेका दृश्यमा तीव्र हावाहुरीका कारण रुख र ठूला विज्ञापन बोर्ड ढलेका देखिएका छन् । केही रुख र बोर्ड सवारीसाधनमाथि खसेका छन् भने धुलो र भग्नावशेषका कारण सडक किनारका काठका पसलमा समेत ठूलो क्षति पुगेको बताइएको छ ।
रिपोर्टका अनुसार धेरैको मृत्यु रुख ढल्दा र घरको पर्खाल भत्किँदा भएको राज्य राहत विभागका एक अधिकारीले बताएका छन् ।
उत्तर प्रदेशका राहत आयुक्तले सामाजिक सञ्जालमार्फत जारी गरेको वक्तव्यमा आँधी, वर्षा, असिनापानी र चट्याङका घटनाबाट प्रदेशभर ठूलो क्षति भएको उल्लेख गरिएको छ ।