दार्चुला । नेपाली कांग्रेसको शेरबहादुर देउवा समूहको दार्चुला जिल्ला अधिवेशनबाट सुरेन्द्रप्रसाद अवस्थी सभापतिमा सर्वसम्मत चयन हुनुभएको छ।
जिल्ला सदरमुकाम खलंगामा आज सम्पन्न विशेष अधिवेशनले अवस्थीको नेतृत्वमा नयाँ पदाधिकारी र कार्यसमिति चयन गरेको हो।
नयाँ कार्यसमितिको उपसभापतिमा लालसिंह धामी र दिलिप सिंह महता चयन हुनुभएको छ भने सचिवमा लालबहादुर चन्द निर्वाचित हुनुभएको छ।
अधिवेशनले पदाधिकारीसहित ३७ सदस्यीय नयाँ जिल्ला कार्यसमिति गठन गरेको महाधिवेशन प्रतिनिधि मदन गिरीले जानकारी दिए ।
जिल्ला अधिवेशनसँगै दार्चुलाका दुवै प्रदेश सभा निर्वाचन क्षेत्रको नेतृत्व पनि चयन गरिएको छ। जसअनुसार प्रदेश सभा निर्वाचन क्षेत्र ‘क’ को सभापतिमा भान सिंह धामी र क्षेत्र ‘ख’ को सभापतिमा पुर्ण सिंह साउद चयन हुनुभएको छ। यसअघि नै जिल्लाका नौवटै स्थानीय तहहरूमा पालिका स्तरीय अधिवेशन सफलतापूर्वक सम्पन्न भइसकेको नेता गिरीले बताउनुभयो।
