१०औं राष्ट्रिय भलिबल छनोटमा विवादः दार्चुला टीम अन्यायमा परेको दाबी

दार्चुला– १०औं राष्ट्रिय भलिबल प्रतियोगिताका लागि सुदूरपश्चिम स्तरीय छनोट खेलमा विवाद उत्पन्न भएको छ। महिला भलिबलतर्फ कैलाली र दार्चुलाबीच भएको सेमिफाइनल खेलमा रेफ्रीहरूले पक्षपातपूर्ण निर्णय गरेको भन्दै दार्चुला टिमले आपत्ति जनाएको छ।

खेलका महत्वपूर्ण क्षणमा दार्चुला टिमले आउट भएको बलको अपिल गरे पनि रेफ्रीहरूले उक्त बल सही भएको भन्दै कैलालीलाई अंक प्रदान गरे। जब दार्चुला टिमले पुनरावलोकनको माग ग¥यो, रेफ्रीहरूले उल्टै दार्चुलाका खेलाडीलाई पहेँलो कार्ड देखाए। स्थिति चर्किएपछि दार्चुला टिमलाई रातो कार्ड दिँदै खेलबाट निष्कासन गरिएको थियो।

दार्चुला जिल्ला भलिबल संघले केन्द्रीय भलिबल संघ समक्ष अनुचित निर्णय गरेको भन्दै रेफ्रीमाथि कारबाहीको माग गरेको छ। संघले बिना नविकरण गरिएका रेफ्रीहरूलाई प्रतिस्पर्धाबाट हटाउन आग्रह गरेको छ। नेपाल भलिबल संघ र सुदूरपश्चिम खेलकुद विकास समितिले यो विषयमा हालसम्म आधिकारिक धारणा सार्वजनिक गरेको छैन। दार्चुला टिमले यदि उचित न्याय नपाएमा उच्च निकायसम्म अपिल गर्ने चेतावनी दिएको छ।