दार्चुला । हमास आक्रमणमा ज्यान गुमाएका दार्चुलाका दुई विद्यार्थीका परिवारलाई इजरायलसरकारले आजीवन सहयोग गर्दै आएको छ ।
हमासको आक्रमणमा परेर ज्यान गुमाएका दार्चुलाको लेकम गाउँपालिका–५ का दिपेशराज बिष्ट र मालिकार्जुन गाउँपालिका–४ का लोकेन्द्रसिंह धामीको परिवारलाई इजरायली सरकारले आजीवन सहयोग गर्दै आएको हो ।
लेकम गाउँपालिका–५ का दिपेशराज बिष्टको परिवारलाई इजरायल सरकारले आर्थिक सहयोग गर्दै आएको स्वगीय बिष्टका मामा नाता पर्ने लेकम गाउँपालिकाका अध्यक्ष रामदत्त जोशीले जानकारी दिए । बिष्टको घरमा पनि इजरायली राजदूत पुगेर परिवारलाई सान्त्वना दिएको बताइएको छ ।
यस्तै दार्चुलाको मालिकार्जुन गाउँपालिका–४ का लोकेन्द्रसिंह धामीको घरमा पनि इजरायली राजदूतसहितको टोली पुगेको वडा अध्यक्ष एवं मृतक धामीका दाजु नाता पर्ने धनसिंह धामीले जानकारी दिए । मृतक धामीका श्रीमती र आमाबुबालाई इजरायली सरकारले आर्थिक सहयोग गरिरहेको उनले सुनाएका छन ।
मृतक धामीका एक छोरा र एक छोरी छन् । उनीहरूलाई पनि १८ वर्ष पूरा नहुँदासम्म आर्थिक सहयोग गर्ने राजदूतले बताएको र सोहीअनुसार सहयोग गरिरहेको पारिवारिक स्रोतले जनाएको छ । लोकेन्द्र धामीकी पत्नीलाई मालिकार्जुन गाउँपालिकाले वडा कार्यालयमा जागीर दिएको छ । इजरायल सरकारले मृतक नेपाली विद्यार्थीहरूलाई इजरायली नागरिक झै व्यवहार गरेको अनुभूति भएको मृतकका आफन्तहरूले बताएका छन् ।
उनीहरूले इजरायली सरकारले देखाएको सद्भाव र उदारताको प्रसंशा गरेका छन् । २०८० असोज २० गते हमासको आक्रमणबाट इजरायलमा १० जना नेपाली विद्यार्थीको मृत्यु भएको थियो। सो घटनामा बन्धक बनाइएका विपिन जोशीको हमासकै नियन्त्रणमा रहदा मृत्यु भएको थियो।
