दार्चुला । दार्चुलाको लेकम गाउँपालिकामा निर्माण भएको नेपाल टेलिकमको टावर सञ्चालनमा आएको छैन ।
निर्माण सम्पन्न भएको करिब ६ महिना हुँदासमेत टावरमा आवश्यक उपकरण जडान नहुँदा सञ्चालन नभएको हो ।
लेकम गाउँपालिका–१ सर्मोली (कोटस्थित) नेपाल टेलिकमको टावर सञ्चालनमा नआउँदा स्थानीयले गुणस्तरीय टेलिफोन तथा इन्टरनेट सेवाबाट बञ्चित हुनुपरेको गुनासो गरेका छन् ।
टावर निर्माण सम्पन्न भएको ६ महिना भइसकेको छ, तर टेलिकमले बेवास्ता गर्दा टावर अहिलेसम्म सञ्चालनमा नआएको लेकम गाउँपालिकाका स्थानीयहरूको गुनासो छ ।
टेलिकमको टावर सञ्चाचलन नहुँदा पानी परेको बेला, तथा रातिको समय फोन र नेट नचल्ने समस्या रहेको छ। दिनमा समेत फोन नलाग्ने र कुराकानी गरेको नसुनिने समस्या छ ।
नेपाल टेलिकमले टावर निर्माण गरेर सञ्चालनमा ल्याउन ध्यान नदिएको सर्वसाधारणको गुनासो छ । तर नेपाल टेलिकम दार्चुलाका प्रमुख कृष्ण गुरुङले टावर छिट्टै सञ्चालनमा ल्याउने बताए ।
उनले अहिले मालिकार्जुन गाउँपालिकामा रहेको टावर सञ्चालन गर्न उपकरण जडानको काम भइरहेको बताएका छन् ।
मालिकार्जुन टावरको काम सकिनासाथ लेकमको टावरमा उपकरण जडान गरिने गुरुङले बताए। उनले ढिलोमा मंसिर १५ गतेभित्र लेकम–१ सर्मोलीको टावर सञ्चालनमा ल्याउने बताएका छन् ।